KALIBO, Aklan–Patay ro sangka 23-anyos nga eaeaki matapos nga ginbuno kaina it aga-aga sa idaeom it lumang tulay it Kalibo-Numancia bridge.
Ro biktima hay nakilaea kay Romel Aros, tumandok it Brgy. Santander, Buruanga apang temporaryong naga-istar sa Oyo Torong Street sa banwa it Kalibo.
Ginpahayag ni Nestor Ortega, sambilog sa unang nakakita sa biktima nga nakabati imaw it boses it tawo nga nagapangison sa guwa it andang panimaeay rason nga insigida imaw nga nagguwa.
Nakibot sigon sanda kat makita nanda ro biktima nga nagahamyangon sa printi it andang baeay samtang nagapangison bangud sa kasakit nga nabatyagan tuga it nagkaeain-eain nga lastro sa anang eawas.
Ginpakamayad sigon nanda nga magtawag sa Kalibo Municipal Police Station para ipaabot ro hitabo.
Posible sigon nga nahimo pa it biktima nga makadaeagan it 150 hasta 200 meter halin sa gin-euntaran it krimen base sa mga marka it dugo nga nagkalhit sa daean.
Nahimo pa nga madaea sa Aklan Provincial Hospital ro biktima apang makataliwan ro pilang oras hay binawian man it hueam nga kabuhi samtang ginabueong.
Sa makaron hay nagapadayun pa ro imbestigasyon it mga otoridad angot sa insidente.
