KALIBO, Aklan—Nagapangasubo makaron ro bilog nga Texas, USA matapos nga mag-eontad ro makangieidlis nga pagpamaril sa sueod it sangka eskwelahan nga ginkamatay it 19 nga mga inunga ag daywang adults ag ginkanina it maabu nga iba pang mga inunga.
Suno kay Bombo International Correspondent Greg Aguilar it Califronia, USA nga base sa inisyal nga imbestigasyon it mga otoridad, owa pa it klaru nga rason kon ham-an nga ginpamaril it 18 anyos nga suspek nga si Salvador Rolando Ramos ro mga estudyante sa Robb Elementary School sa Uvalde, Texas.
Si Ramos sigon hay sangka high school student ag gina-describe it anang mga kaparehong working student sa sangka fast food chain nga sangka “loner” ukon hipuson ag owa masyadong nakikipag-socialize.
Ro suspek hay napatay man it mga rumespondeng pulis.
Antes ro insidente, ginbaril man it suspek ro anang lola nga una makaron sa kritikal nga kundisyon.
Ginbaeabagan sigon imaw it anang lola nga magpanaw matapos nga mataeupangdan ro anang bitbit nga daywang AR-15 rifles ag nakasuksok it body armor nga matsa naga agto sa suicide mission.
Ginasugid nga nakaexperiensiya it grabeng pagpang-bully ro suspek sa eskwelahan bangud sa diperensiya sa paghambae ag ro kamatuoran nga halin imaw sa pobreng pamilya.
Gin-post pa sigon nana sa anang Instagram ro nabakae nga mga armas.
Samtang, kumpara sa ibang mga estado sa Amerika, bukon sigon it masyadong instrikto ro pagbakae it automatic armalite rifle tuga it andang pagiging pro-gun.
Owa eon it background check ag pwedeng bitbiton sa guwa it baeay nga owa it permit.
