KALIBO, Aklan–Pwede eon nga magpaturok it ikaywang booster shot it bakuna kontra covid-19 ro mga Kalibonhon nga senior citizen, health workers ag mga may immunocompromised.
Raya ro ginpahayag ni Marshelle Mary Grace Manalo, Nurse II it Rural Health Unit ukon RHU 1-Kalibo kadungan it nagapadayun nga bakunahan sa vaccination site sa covered court it kalibo pastrana park.
Raya hay sa tunga man it bag-ong paeag it nadiskubreng sub-variant it Omicron nga BA.2.12.1.
Suno kana nga nagabaton sanda it walk-in sa mga gustong magpabakuna it 2nd booster shot nga mga indibidwal nga kaibahan sa mga priority group ro A1 ukon essential health service workers ag ro mga naga-edad it 60-anyos pataas kamana man ro mga may immunocompromised.
Ro mga bakuna sigon kontra COVID-19 it Pfizer ag Moderna ro pagagamiton ag dapat hay ap-at nga buean eon ro nagtaliwan umpisa nga sanda hay maturukan it andang unang booster-dose.
Ro 2nd booster shot hay pang-ap-at eon sigon nga igaturok nga bakuna bilang proteksyon sa deadly virus.
