KALIBO, Aklan—Ginpaathag ni Atty. Plaridel Morania, sangka batikang abogado sa Aklan nga ro tanan nga akusado hay may kinamatarung nga mag atubang sa korte agud nga masayuran kon legal ukon sandig sa laye ro anang pagkakulong.
Raya hay may kaangtanan sa pagka-aresto sa guwardiyang si Mark Archie Torrefiel, 31 anyos, tubong banwa it Batan ag temporaryong naga istar sa Brgy. Cajilo, Makato nga imaw ro ginaturo nga nagapangunang suspek sa pagpatay sa 23 anyos nga manager-reliever it RD Pawnshop nga si Bonna Hercia Ambay nga tumandok it Brgy. Nauring, Pandan, Antique.
Suno kay Atty. Morania nga maskin ano pa kabakod ro ebidensiya, ro sin-o man nga akusado hay may kinamatarung nga maghipos sa tiempo it pag imbestiga.
Mag-eowas kara, kinamatarung man nana nga magbo-oe it abogado nga maga-representar kana sa korte agud nga eubus nga maeubtan ro rason it anang pagkakulong ag ro laye nga anang gin-eabag nga imaw ro naging baeasihan agud nga imaw hay mapresu.
Gindugang pa ni Atty. Morania nga sa tiempo nga ginapamatian ro anang kaso, imaw hay may kinamatarung nga ipabutang nga inosente hasta nga owa pa napamatud-an nga imaw hay nagkasaea.
Mag-eowas kara, may kinamatarung man ro akusado nga magpiyansa para sa anang temporaryong kahilwayan.
Sa pihak nga parte, ginpaathag dugang ni Atty. Morania nga ro regular filing ukon inquest proceeding hay ro pagbaton it prosecurtor it mga papeles ag ebidensiya sa pag-aresto sa suspek.
Pagataw-an man sigon raya it kahigayunan nga magdihon it counter affidavit bilang pagdepensa sa kaugalingon.
Dikara man sigon masayuran kon may probable cause ukon guilty ro akusado sa krimen.
