Naga-abot eon sa eampas sa P100 pesos ro kada litro it mga produktong petrolyo sa pilang probinsiya matapos ro panibag-ong big time price increase ko adlaw it martes.
Halimbawa eamang sa Puerto Princesa City, Palawan ag Odiongan, Romblon, naga-abot eon sa P97 hasta P108 pesos ro kada litro it diesel sa pilang gasolinahan samtang kapin sa P107 eon ro gasolina.
Base sa monitoring it Department of Energy, kapin sa P97 pesos per liter eon ro premium diesel sa Ormoc City, Leyte; P94 pesos sa Zamboanga City samtang P93 pesos ro gasolina sa banwa it Claveria, Cagayan.
Sa pihak kara, bagsak sa P60 pesos ro kada litro it gasolina sa Bongao, Tawi-Tawi bangud nga nagahalin ro andang supply sa kaiping nga nasyong Malaysia.
Samtang, naghubeag protesta man ro grupong PISTON agud nga ipanawagang suspendihon eon ro excise tax ag value-added tax sa petroleum products.
Apang makapilang beses eon nga ginbasura it Malakanyang ro hirit it mga transport group bangud nga ro buwis sigon nga ginakolekta sa langis hay ginagamit sa nagkaeain-eain nga proyekto it gobyerno.
