KALIBO, Aklan–Gin-engganyo it Department of Science and Technology (DOST) ro publiko nga i-download ro sangka app nga sarang maka-detect it kondisyon it tyempo sa sangka partikular nga lugar.
Ginpahayag ni Raymund Jacinto Sucgang, Supervising Science Research Specialist it DOST- Philippine Nuclear Research Institute nga makabig man nga sangka weather station ro nasambit nga app.
Sa kamatuoran suno kana hay may daywang ka mga gadget sanda nga gin-install sa Aklan partikular sa banwa it Batan ag Nabaoy Elementary School sa Malay.
Ro app suno kana hay nagahaboy it impormasyon kada 30 minuto kung siin sarang kara nga ma-detect ro wind speed, wind direction, kaabuon it uean, air temperature, solar radiation ag maabu nga iba pa.
Ro app hay pwedeng ma-install sa cellphone pinaagi sa pagtype it https://www.fieldclimate.com.
Matapos nga idownload hay kinahag-ean eamang nga pinduton ro magaguwa nga icon ag maglog in kung siin ro username hay ‘rjsucgang’ ag ro password hay ‘dostpnri’.
Mag-euwas sa Aklan, may kaparehong gadget man nga ginbutang ro andang taeatapan sa Baguio, Surigao, Zambales ag Catanduanes.
Raya sigon hay maghalin sa Vienna, Austria matapos ro anang pagtinguha sa ginpatigayun nga pueong antes tumama ro pandemya.
