KALIBO, Aklan—Indi mabalibaran ro mga ginatao nga sakripisyo it kada ama sa andang natungdan nga mga pamilya.
Rason nga nagakadapat eamang nga dumdumon natun sanda makaron nga adlaw pinaagi sa pagtamyaw it “Happy Father’s Day”.
Kabay nga indi eamang magtapos makaron nga adlaw ro atun nga pag-aprisyar sa atun nga mga ginikanan.
Dapat nga adlaw-adlaw natun nga ipabatyag kanda ro atun nga pag-ulitikid ag pagpalangga.
Sa programang Good Morning Philippines, ginpakigbahin ni Raffy Cooper, sangka ama nga miyembro it LGBTQ+ community ro anang eksperyensya bilang single parent sa anang tatlong ka mga unga.
Suno kay Cooper nga owa nasusukat ro pagiging ginikanan sa sekswalidad.
Ro kinahang-ean sigon hay ipakita sa mga unga ro matuod nga pagpalangga, pagtao it seguridad ag proteksyon.
Aminado si Cooper nga naging hangkat kana ro pagiging sangka miyembro it LGBTQ+ community apang owa nana raya ginpabay-an nga maging sab-eag para gampanan ro anang obligasyon.
Sa baylo hay mas pa sigon imaw nga nagtinguha para maitao ro mga kinahang-eanon it anang mga unga.
Kapareho it mga eaeaki, ginapabatyag man sigon nana ro anang suporta sa mga gusto ag hilig it anang mga unga.
Mag-euwas sa pagtao it pinansyal nga suporta sa pamilya, sambilog pa sigon sa importanteng papel it ama hay ro pagtanom it mga manami nga pamatasan sa mga unga.
