INTERNATIONAL News — Nagpaguwa eon it desisyon ro US Supreme Court nga nagabawal sa federal constitutional right sa abortion.
Raya hay matapos nga mabaligtad it Korte Suprema sa US ro makasaysayang 1973 “Roe vs. Wade” decision nga nagatau it kinamatarung sa mga kababayin-an nga magpaidaeum sa abortion.
Base sa natabu nga botohan, limang justices ro nagpirma sa majority opinion nga ginaeakipan nanday Clarence Thomas, Samuel Alito, Brett Kavanaugh, Neil Gorsuch ag Amy Coney Barrett.
Tatlo man ro nagkontra nga ginaeakipan nanday Stephen Breyer, Sonia Sotomayor ag Elena Kagan.
Owa man nagpasakop sa majority si Chief Justice John Roberts ag ginhambae nga indi eon nana igabasura ro Roe Vs. Wade ruling ag sa baylo hay pagapanindugan eon kara ro laye sa Mississippi nga nagabawae sa abortions.
Raya hay nagakahueugan nga ro abortion hay bukon eon it federal constitutional rights ag igabalik eon lang sa mga nagkaeain-eain nga estado nga sanda ro mag-regulate kara.
Matapos ro desisyon hay nagpatigayon it hubeag protesta ro mga pro-abortion kun sa siin nagpaguwa man it nagkaeain-eain nga opinyon ro mga mataas nga opisyal it US.
Madumduman nga ko 1973, nagpaguwa ro US Supreme Court it desisyon nga 7-2 nga nagapabakod sa legalidad nga ro abortion hay kinamatarung it babaye base sa Fourteenth Amendment to the Constitution.
Bangud sa desisyon hay nagatau sa kababayin-an it kinamatarung sa abortion samtang raya hay naganabdos.
