KALIBO, Aklan—Ro uman nga pagpadayun it registration it botante makaron nga adlaw it Lunes, Hulyo 4 nga magatapos hasta Hulyo 23 para sa Barangay ag Sangguniang Kabataan Elections hay magabaton it iba pang mga transaksyon kapareho it transfer, change or corrections of entries ag reactivation.
Suno kay Chrispin Raymund Gerardo, tagapaghambae it Commission on Elections ukon Comelec-aklan nga raya hay base sa Resolution No. 10798 it komisyon.
Ro pag-apply hay kinahangean nga personal nga pagahimuon sa opisina it Election Officer it kada banwa kun sa siin ro bukas raya umpisa alas-8:00 it agahon hasta alas-5:00 it hapon kada Lunes hasta Sabado, kaibahan ro mga holiday.
Ro sangka botante hay dapat nga indi magnaba sa 18 anyos sa mismong adlaw ukon antes ro eleksyon sa barangay sa Disyembre 5, residente it Pilipinas nga indi magnaba it sang dag-on sa lugar it pagboto ukon indi magnaba sa 6 nga buean antes ro eleksyon.
Gindugang pa ni Gerardo nga ro mga botante it SK hay dapat nga indi magnana sa 15 anyos apang indi magsobra sa 30 anyos ro edad, naga-istar sa lugar it indi maganaba sa 6 nga buean sa adlaw ukon antes ro December 5.
Ro mga aplikante hay dapat nga magdaea it mga dokumento kapareho it national ID sa idaeum it Philippine Identification System ag iba pang valid IDs nga may pirma ag litrato.
Ginpahayag dugang nga madayun ukon indi ro eleksyon sa Disyembre hay nagapahaum eon sanda sa komisyon.
