Mahina sa Science ag Math ro mga Pilipinong estudyante.
Sa simpleng math, indi eon maka-eubot ro kaabuan.
Sa patag it science, masyado eon nga ulihi.
Rason nga kon nagasukoe sa kumpetisyon sa mga nasambit nga patag sa ibang nasyon, indi makasueong ro mga estudyanteng Pinoy.
Ko Disyembre 2020, pinakamanaba ro nabo-oe it mga estudyanteng Pinoy sa ginpatigayon nga international assessment for mathematics and science para sa Grade 4 nga ginatawag nga Trends in International Mathematics and Science Study 2019.
Sa 58 nga nasyon nga nagpasakop, pinakamanaba ro score it Pilipinas.
Nakabo-oe eamang it 297 sa mathematics ag 249 sa science.
Nagpanguna man ro Singapore nga may score nga 625 sa Math ag 595 sa science.
Makarondaya man ro nagaguwa sa assessment it World Bank sa mga estudyanteng Pinoy—mahina sa math ag science.
Suno sa world bank, sambilog sa ap-at nga Grade 5 students hay mahina sa mathematics skill ag ap-at sa limang 15-anyos nga estudyante hay indi maka-eubot it basic mathematical concepts kapareho it fraction ag decimals.
Suno sa world bank nga posibleng ro nasambit nga problema hay bangud sa naexperiensiyahan nga gutom it estudyante, kakueangan it pasilidad, bullying ag iba pang safety issues.
Raya hay pila eamang sa problema it edukasyon sa nasyon nga dapat nga matutukan ni Vice President ag DepEd secretary Sara Duterte.
Nagpromisa si Sara it pagbag-o sa sistema it edukasyon agud nga makaangkon it kalidad.
Dapat nga sayuron ni Sara ro mga rason kon ham-an nga nagaka-ulihi ro mga estudyante.
Mag-eowas sa kahinaan it mga estudyante,tutukan ro problema sa kakueangan it mga mayad nga estudyante.
Kun mayad ro mga manugturo , mayad man ro mga estudyante.
Taw-an it atensyon ro problema it mga manugturo angot sa suweldo nga pirmeng naaywan.
Kinahang-ean man nga mausisa ro mga ginagamit nga textbooks it mga estudyante nga tadtad it mga saea nga impormasyon.
Handum ni Sara ro may kalidad nga edukasyon para sa mga unga.
Tigsambilog anay nga solbaron ro mga problemang nagiging sabeag sa pag-angkon it de-kalidad nga edukasyon.
