KALIBO, Aklan–Dismayado ro Filipino community sa bahin it Texas, USA matapos ro naging kapas-eawan it Pinoy boxer nga si World Boxing Council (WBC) world featherweight champion Mark Magsayo kontra kay undefeated Mexican professional boxer Rey Vargas.
Suno kay Bombo International Correspondent Pinoy Gonzales nga maabu ro nagakanugon sa naging performance ni Magsayo.
Dapat sigon nga nakaangkon imaw it game strategy ag owa eamang nag-focus sa game plan.
Sa patag sigon it boxing, kinahang-ean nga sundan ro hueag it ka-engkwentro agud nga makadungan sa ginabuhian nga bayo.
Sa pihak kara, maabu sa gihapon ro nagpahayag nga manami ro ginpakita nga hampang ni Magsayo apisar nga owa naging madinaeag-on.
Raya man ro kauna-unahang piyerdi ni Magsayo sa anang boxing career.
Madumduman nga nagdaog si Vargas via split decision sa score nga 115-112, 114-113 ag 115-112.
Sa makaron, si Vargas eon ro nagabuyot it World Boxing Council (WBC) featherweight belt.
