Ginaduso makaron ni Kalibo sangguniang bayan member Raymar Rebaldo nga himuong limang dag-on maghalin sa tatlong dag-on ro franchise validity it mga tricycle nga nagabyahe sa banwa it Kalibo.
Raya hay agud nga taw-an it ligwa ro mga driver/operators nga makatipon pa it andang pambayad sa renewal.
Ginpahayag dugang ni Rebaldo nga mag-eowas kara, eubus nga naapektuhan ro mga raya sa nagtaliwan nga pandemya.
Ginpaathag nga ro dugang nga daywang dag-on hay uwa man it dugang sa andang presenteng ginabayad nga nagaabot sa haeos P2,000 pesos.
Kinahang-ean nga mataw-an it igtaeopangod ro mga marginalized sector bangud nga maabo man ro pwede nga maboe-an it pondo kon ro ginakabaeak-an hay makaapekto raya sa makolekta nga kita it lokal nga gobyerno.
May kaangtanan kara, paborable ag magiging eubus ro kalipay it mga tricycle drivers/operators engkaso nga madayon ro proposisyon ni Rebaldo bangud nga suno kay Federation of Kalibo Tricycle Operators and Drivers Inc. ukon FOKTODAI president Johnny Damian, mag-eowas nga inde maabala ro andang pagbyahe hay makatipon pa sanda sa sueod it limang dag-on partikular makaron nga sangkiri ro andang kita bangud sa mahina nga byahe.
