KALIBO, Aklan–Padayon nga nae-ekperyensyahan it mga pumueoyo sa Russia ro epekto it nagakaeain-eain nga sanctions nga ginpaidaeom kanda it UN kasunod sa pagsakop it nasyon sa Ukraine.
Suno kay Bombo International Correspondent Alma Arcilla it Moscow, Russia nga asta sa makaron padayon ro andang ginapatigayon nga adjustment sa mga bag-ong sueundanan ag mga epekto it padayon nga giyera sa tunga it Russia ag Ukraine.
Makabig sigon nga domino effect it giyera ro andang ginapangatubang sa makaron partikular sa pagpadaea it remittance sa Pilipinas.
Maabu sigon nga nagsaearado nga remittance center ag bangud sa bank sanction nga ginpaidaeom it UN sa Russia may mga bangko sigon sa Pilipinas nga indi pagbatunon ro ano man nga transaksiyon maghalin sa Russia kung siin awtomatiko nga nagabalik kanda ro kwarta.
Nagahinyu eon lang sigon sanda sa mga kabarong Pilipino nga sa kaeapit nasyon para makapadaea it kwarta.
Sa pihak nga parte, maabu man nga mga daeagkuan nga mag kompanya ro nagsaearado bangud sa Russia-Ukraine crisis.
Samtang, sa makaron owa pa it pagpabutyag ro Russia nga pagatapuson ro giyera bangud nagatutuk sanda sapagpa-umwad it andang ekonomiya apisar it mga nagakaeain-eain nga sanctions nga ginapangatubangn.
