Hugot nga nagpadumdom ro Social Security System ukon SSS sa mga members and contributors nga inde gid pag-itao ro log-in credentials sa mga bukon it kilaea nga tawo.
Raya hay kasunod sa naging reklamo it sangka member nga si Elner Zolina it banwa it New Washington kon siin nadiskubrehan nga may nagloan sa anang account nga bukon it imaw ro personal nga nagproseso.
Ginpaathag ni Rene Gonzalez, branch manager it SSS Kalibo nga mahabang proseso ro paga-agyan sa imbestigasyon bangud nga ro tanan nga transaction sa ahensya hay electronic kon siin posible nga na-credit eon ro kantidad sa bank account nga ginamit sa sueod it tatlo hasta limang adlaw nga processing period.
May ginasundan nga bank secrecy law rason nga inde basta-basta nga magta-o it detalye ro bangko.
Ro mahimo pa eamang sigon nanda makaron hay padayunon ro andang imbestigasyon bangud nga posibleng mayad sa teknolohiya ro nagbukas sa anang account rason nga madaling naka-apply para sa salary ag calamity loan ko buean it Abril.
Madumduman nga nagpaabot it reklamo sa Bombo Radyo si Mr. Zolina bangud sa anang natukiban ag ginabakaeak-an kara nga magabayad imaw it utang nga uwa kana naadto ro kwarta
