Sugot ro sangka ginikanan ag mananahi sa Kalibo shopping center nga si Medina Salvador nga ibalik eon sa full face to face ro klase it mga estudyante sa pagbukas it school year.
Suno kana, mas manami nga sa eskwelahan ro mga inonga bangud nga mag-eowas nga makaconcentrate sanda sa ginaturo it mga maestra hay anda pa mismo nga inobrahan ro gina-chekan it mga manugturo.
Eain ag mas maeayo sa modular learning nga ro mga ginikanan ro nagakamas sa pagsabat sa mga modules it mga estudyante eabi eon gid kon dali lang raya inugpasa.
Maabo sa mga estudyante ro nagtinamad sa pag-eskwela bangud nga nagasalig sa ginikanan.
Obligasyon suno kay Salvador it mga ginikanan nga paeskwelahon ro andang mga inonga ag itao ro andang mga kinahang-eanon ag mas bentaha kon nagasueod gid ro mga raya sa eskwelahan.
Mag-eowas sa maka-exercise ro andang eawas hay maabo pa ro andang matun-an.
Nasayuran nga target makaron it Department of Education ukon DepEd nga ibalik ro implementasyon it 100% face to face classes sa buean it Nobyembre.
