KALIBO, Aklan—Haum nga haum eon ro Kalibo Pilot Elementary School, sambilog sa pinakamabahoe nga pampublikong eskwelahan sa probinsiya it Aklan sa ginaproponer nga 100% face-to-face classes sa Nobyembre.
Suno kay Allan Relloto , Principal II it nasambit nga eskwelahan nga mabuhay eon sanda nga haum bangud nga haeos daywang dag-on man nga owa it face-to-face classes tuga it COVID-19 pandemic.
Posible suno kana nga sa Agosto 22 sa pagbukas it klase hay igapatuman nanda ro blended learning ag shifting it klase agud nga mapatuman ro physical distancing.
Nagahueat pa suno kana sanda it dugang nga instructions kon ano ro magiging set-up sa pag-umpisa it full face to face classes.
Posible sigon nga iga-limit nanda ro numero it mga estudyante sa sangka klase agud nga indi maggutok, apang magadepende raya sa size it sangka classroom.
Pagasiguraduhon man nanda nga pagasundon ro minimum health standard kontra covid 19.
Nasayuran nga nakapending pa sa division office ro request it Kalibo Pilot Elementary School para sa pagpatigayon it limited face to face classes.
Sa pihak nga parte, “wait and see” man sigon sanda sa magiging pinal nga mandu angot sa patakaran sa school uniform kun sa siin bukon eon it “strict requirement” makaron nga bukas it klase.
