KALIBO, Aklan—Haum eon ro militanteng grupo sa probinsiya it Aklan sa pagsug-aeaw it protesta sa unang State of the Nation Address ukon SONA it ika-17 nga pangueo it Pilipinas nga si Ferdinand “Bongbong” Marcos, Jr. sa Lunes, Hulyo 25.
Suno kay Kim Sin Tugna, provincial coordinator it Bagong Alyansang Makabayan ukon Bayan-Aklan nga umpisa agahon hasta hapon hay magapatigayon ro nagkaeain-eain nga chapter it andang grupo it mga aktibidad sa bilog nga nasyon.
Bandang alas-2:00 it hapon halin sa Kalibo pastrana park hay maga-marcha ro militanteng grupo kaibahan ro iba pang multi-sectoral nga mga grupo paagto sa Kalibo Apsta para sa indoor activity.
Dikara hay pagatalakayon sigon nanda ro angot sa tawhanong kinamatarung, red tagging it Armed Forces of the Philippines nga nagatuga it peligro sa kabuhi it mga lider-komunista ag ro pagpatigayon it mga aktidad it 301st infantry brigade sa mga komunidad it Kalibo ag New Washington.
Ginpahayag pa ni Tugna nga nagpadaeagan si Marcos bilang presidente nga owa it anuman nga plata porma de gobyerno sa atubang it nagatinaas nga presyo it nagapangunang baeak-eon.
Gusto sigon nanda nga ipaabot sa presenteng administrasyon ro 9 point program para sa kamaeayran it mga mangingisda, mangunguma, urban poor, sektor it transportasyon ag iba pa kamana man nga mabasura ro mga polisiya ag programa it gobyerno nga nagapa-antus sa mga pumueuyu.
Ginasinggitan man nanda ro pagrespeto sa civil and political rights it mga militanteng grupo.
