KALIBO, Aklan–Kapin sa 13 ka mga kaso eon it dengue ro nailista it Barangay Poblacion, Ibajay.
Ginpahayag ni Punong barangay Remar Bautista nga una sanda nga nakalista it kaso ko buean it Mayo.
Agud nga mapunggan ro pagkalhit it virus, insigida imaw nga nagpatawag it emergency meeting kaibahan ro barangay council ag mga purok leaders.
Ginkasugtanan sigon nanda nga maglimpyo sa kada ugsaran kaeakip ro mga drainage system nga posibleng istaran it namok.
Kaeabanan sigon sa nagka-dengue sa andang barangay hay mga unga ag estudyante.
Sa makaron, nagapadayun sigon ro andang implementasyon it 4 o’clock habit nga maglimpyo sa kaugalingon nga panimaeay.
Sa raya nga pamaagi hay malikawan ro pagtinir it mga namok nga may daea nga dengue virus.
Base sa datus, ro banwa it Ibajay ro nagapangunang banwa sa bilog nga probinsya it Aklan nga nakalisa it maabu nga kaso it dengue.
