Personal nga motibo ro naga-guwa sa imbestigasyon it kapulisan angot sa pagpamaril-patay it suspek sa shooting incident nga nag-eontad sa sueod it Ateneo de Manila University nga ginkamatay it tatlo nga mga tawo.
Nakilaea ro suspek kay Chao-Tiao Yumol, 38-anyos, sangka medical doctor nga taga-Lamitan City, Basilan.
Ginpahayag ni QCPD director Police Brigadier General Remus Medina,dati eon nga nag-file ro Furigays it kapin sa 76 cyber libel cases kontra kay Yumol.
Nagabaeaylohan eon sigon ro daywa dati pa it mga kaso rason nga naga-guwa sa andang imbestigasyon nga personal ro away it daywa.
Nasayuran nga bangud sa mga kaso nga ginpasaka it mga Furigays kung haman it indi maka-practice sa anang pagkadoctor ro suspek.
Suno man kay Atty. Quirino Esguerra, abogado ni Furigay, nga owa it kamatuoran ro naging pahayag it suspek nga ginpatay kara ro dating alkalde bangud sa illegal drug trade.
Ginpahayag man it legal counsel nga akig ro suspek kay Furigay bangud sa pagpasarado kara sa anang clinic maeapit sa Lamitan City Hall.
Sandig pa sa padayon nga ginahiwat nga imbestigasyon it mga pulis nga nagsakay si Yumol sa ride-hailing car paagto sa campus nga kung siin daea kara ro daywa ka firearms.
Ginatutukan man it mga pulis kung paano nakaeusot ro armas-luthang it suspek apang sa may inisyal nga mga pahayag nga owa na-inspect ro saeakyan nga daea it suspek.
Samtang may naboue man ro mga pulis nga daywang baril ag mga bala sa suspek.
Ginapahayag nga may silencer man ro gingamit kara nga armas.
Sa pihak nga parte, bangud sa nag-eontad nga shooting incident patay si former Lamitan City Mayor Rose Furigay, ro anang long-time aide nga si Victor Capistrano, ag ro university security guard nga si Jeneven Bandiala.
Samtang, ninahan man ro 25-anyos nga onga ni Furigay nga si Hannah nga magatambong kunta it ana nga graduation ceremony sa College of Law sa nasambit nga unibersidad tag natabo ro makasueubo nga insidente.
Sa makaron under control eon ro sitwasyon sa ADMU ag ginpasiguro man it katapu it kapulisan nga ro raya nga sambilog sa makabig nga isolated case hay indi makaapekto sa seguridad sa unang State of the Nation Address ni President “Bongbong” Marcos Jr.makaron nga adlaw, Hulyo 25
