Padayun ro pag-usisa sa mga nagakabagay ag maskin sa mga owa eon it K ukon kinamatarong nga maeakip sa Pantawid Pamilyang Pilipino Program (4Ps).
Ginaeauman nga igapaguwa ro listahan it mga bag-ong benepisaryo ag ro mga nakakas halin sa 4Ps sa Setyembre ukon Oktubre makaron nga dag-on.
Ro mga nabo-oe halin sa listahan hay ro mga pamilya nga owa eon it unga nga naga-edad it 18 panaba ukon naga-eskwela; ro mga nagakita it P12,000 pesos pataas kada buean; ro mga nakaabot eon it 7-year duration it programa; ro mga non-compliant ukon naga-eabag sa mga kondisyon sa idaeum it 4Ps ag ro mga ginpaisoe ro andang membership.
Sa makaron, ginaproseso pa ro pag-validate sa listahan it 1.3 milyong benepisyaryo nga makaron hay ginakabig nga non-poor ag bukon eon it kwalipikadong makabaton it cash aid halin sa gobyerno.
Samtang, ro mabakanteng slots hay igatau man sa mga bag-ong aplikante nga una sa waiting list.
Nauna eon nga ginpahayag nga naga-abot sa 2 milyong benepisaryo ro mabo-oe halin sa listahan it 4Ps.
Makabig nga mabahoe nga bulig ro ayuda eabi eon sa mga matuod nga pinaka-pobre.
Maabu nga mga handum ro mataw-an it katumanan ag sa ulihi hay maabu nga pamilya ro magabangon sa kapigaduhon ag magiging dugang nga pwersa sa nasyon para man sa mas maayos ag maumwad nga pagpangabuhi.
Rason nga importanteng bagay nga mabulgar ro listahan it 4Ps.
Pinaagi kara hay magiging kaparte ro publiko sa pagtumod kon nagakabagay nga maeakip ro sangka pamilya sa mga paga-ayudahan.
Maisot eang ro sangka barangay ukon lugar para indi matumod it kada isaea kon sin-o ro mga makabig nga nagakalisod ag mga may ikasarang sa kabuhi.
Samtang, nagaeaum kita nga mas maabu pang programa ro mabilog bilang suporta sa tanan bukon eamang sa pinaka-pigado kundi maskin sa mga nagakita , apang bastante eang para sa pamilya.
Indi maitago sa sobrang kataason it mga baeak-eon, bukon eon it bastante kon sambilog eamang ro nagatrabaho sa pamilya.
Kabay nga may magbukas nga oportunidad agud nga makaangkon it dugang nga paeangitan-an.
Kumbaga, raya eon ro kahigayunan agud nga makabawi ag matabu eamang raya kon magabueuligan ro publiko , gobyerno ag una sa pribadong sektor.
Sa ulihi, ro tanan hay magapanipueos kon maumwad ro nasyon .
