KALIBO, Aklan—Gin-anunsyo it Suki gasoline station sa banwa it Banga nga mag-eowas sa panibag-ong rollback sa presyo it produktong petrolyo makaron nga adlaw it Martes hay magapatuman pa gid sanda it pagbawas sa presyo it diesel ag gasoline products.
Suno kay Vanillo Asis, officer- in-charge sa nasambit nga gasoline station nga epektibo kahapon nga adlaw, kada alas-4 hasta alas-6 it gabi-i hay nagapatuman sanda it tatlong piso nga bawas sa andang mga baligya nga petroleum products nga ginatawag nanda nga “happy hours”.
Ginpahayag nga ro tatlong piso nga rollback hay nagatuyo nga mabawasan ro epekto sa mga motorista eabi eon sa mga driver it mga pampublikong transportasyon.
Madumduman nga umpisa makaron nga adlaw it Martes hay ginpatuman it mga kompaniya it langis ro ika-ap-at nga sunod nga domingo nga pagbawas sa sukot sa presyo it produktong petrolyo.
Naga-abot sa P1.85 ro bawas sa sukot sa presyo it kada litro it diesel; 40 sentimos man ro gin bawas sa kada litro it gasolina ag P1.30 ro ginbuhin sa kada litro it kerosene.
Apang ginklaru ni Asis nga owa sanda it baligya nga kerosene.
Sa pihak nga parte, bilang sangka ordinaryong trabahador, nagaeaum si Asis nga matutukan it gobyerno ro inflation rate ukon padayun nga pagtaas it presyo it mga nagapangunang baeak-eon sa nasyon kamana man nga mapatuman ro ENDO ukon end of contractualization.
Ginpahayag dugang nga kabay nga maaksyunan ni Pangueong Marcos sa anang unang SONA ro mga ginplastar kara nga mga priority bills para sa kamaeayran it publiko ag nasyon.
