KALIBO, Aklan—Kumporme ro pilang mga mangunguma sa probinsiya it Aklan sa naging mensahe ni Pangueong Ferdinand Marcos Jr., sa anang State of the Nation Address ukon SONA ko Lunes partikular sa sektor it agrikultura.
Suno kay Joneval Villas, sangka mangunguma sa probinsiya nga satisfied sanda sa ginplastar it pangueo nga mga solution kara para sa andang sektor.
Apang kabay nga mataw-an suno kana it katumanan ag bukon it puro promisa eamang.
Mabahoe ro andang pagpati nga mataw-an it insigidang aksyon it gobyerno ro andang mga kinahangeanon sa pre-production ag post-production.
Sa makaron sigon hay masyado sandang apektado bangud sa sobrang kataason it presyo it abono, pestisidyo, produktong petrolyo ag iba pang baeak-eon.
Magiging malipayon man suno kana sanda kon pagapataasan it gobyerno ro pagbakae sa andang ani nga paeay nga ginabakae makaron it P19 it National Food Authority ukon NFA.
Nagakabaeaka sigon sanda kada naga import it bugas ro nasyon bangud nga siguradong pagabaraton it mga bentahosong negosyante ro pagbakae it andang paeay tuga it over supply.
Samtang, ginhinyu man nana nga suportahan it gobyerno ro mga ginatukod nga farmer cooperatives para sa andang kamaeayran.
