KALIBO, Aklan—Bangud nga owa it teknolohiya nga maka-predict sa pagtama it linog, ginpahayag ni Terrence Toriano, head it Municipal Disaster Risk Reduction and Management Council ukon MDRRMC-Kalibo nga kinahangean nga mas pang pabaskugon ro information and education campaign agud nga maging haum ro mga pumueuyu sa pagtama it kalamidad partikular ro mabaskog nga linog.
Nagaeaum imaw nga sa oras nga magpatigayon it trainings sa kada barangay hay maabu ro magapartisipar.
Kinahangean suno kana nga maging haum ro komunidad sa oras it emerhensiya rason nga importante nga makabilog it search and rescue team.
Gindugang pa ni Toriano nga ro kultura it tingob nga pagsabat sa emerhensiya hay nagapaugan sa epekto it kalamidad, nababawasan ro numero it mga pagkamatay ag kahalitan nga tuga kara.
Sa pihak nga parte, ginsuhestiyon man nana ro pag angkon it disaster kit it kada pamilya ukon kada isaea bangud nga mabahoe raya nga bulig agud nga maka-survive.
Magtipon suno kana it bastante nga mga supply nga magabuhay it sang domingo sa sangka bag.
Ibutang raya sa eowas nga lugar nga madaling mabo-oe.
Pila sa mga dapat nga sueod kara hay ro tubi, pagkaon, flashlight, radyo, battery, cellphone, first aid kit, bueong, eambong ag iba pa.
