KALIBO, Aklan—Nagapadayun pa hasta sa makaron ro imbestigasyon sa natabu nga sunog sa sangka boarding house nga himo sa mixed materials pasado alas-12:00 kaina it hapon sa Abierra Road, Roxas Avenue Extension, Barangay Andagao, Kalibo.
Naging mabudlay ro pagresponde it mga katapo it Bureau of Fire Protection ukon BFP-Aklan ag Kalibo bangud sa mapi-ot nga lugar.
Medyu nabuhayan pa sigon ro ginhimo nga fire fighting bangud nga gin-assemble pa it mga bumbero ro andang mga hose agud nga maghaba.
Suno kay Mrs. Mercedez Cuales, sambilog sa mga residente sa lugar nga ro nasambit nga boarding house hay ginapanag-iyahan it pamilya Lopez.
Nagbueuligan sigon ro mga residente agud nga matapna ro kaeayo.
Sa mayad nga swerte, owa man it napabalitang naninahan sa insidente.
Natukiban nga sa likod it baeay hay may mga nakatambak nga mga PVC pipes ag iba pang flammable materials.
Nakaresponde man sa lugar ro fire truck it BFP-Banga.
Sa pihak nga parte, mabahoe ro pagpati it pamilya lopez nga ro andang ginbo-oe nga kabulig nga si alyas Rommel Gallera, 24-anyos , residente it Brgy. Daja Norte, Banga nga sangka miyembro it LGBTQ community ro nagsunog sa andang baeay.
Suno kay Jomel Lopez, tag-ana it baeay nga nagdesisyon sanda nga pahalinon ro andang kabulig bangud sa pagpati nga naga angkon raya it nervous breakdown.
Nataeupangdan sigon nanda nga nagtinangis raya kabi-i bangud nga owa naila nga mag-uli.
Haeos daywang domingo pa eamang sigon raya nga naga-istar kanda.
Ginatumod pa it arson investigator ro ginhalinan ag kahalitan it natabu nga sunog.
