Ginklaro ni Punong Brgy. Neil Candelario it Poblacion, Kalibo nga naayos eon ro gulo sa tunga it mga babayeng pamatan-on nga naboe-an it video ag nagviral pa sa social media.
Nagkaatubang eon sigon ro mga raya kaibahan ro andang mga ginikanan ag gin-istoryahan ro andang ginhimo nga nagsamad sa imahe it banwa it Kalibo ag probinsya it Aklan.
Ginlaygayan sigon nanda ro mga pamatan-on kaibahan ro Kalibo municipal police station ag gintuad nanda ro mga rason sa likod it nasambit nga maaksyon nga gulo nga bukon eamang it sa pastrana park natabo kundi sa iba pang lugar sa Kalibo.
May kaangtanan kara, sa Agosto 13 it agahon, kaibahan ro mga imbolbadong pamatan-on hay pagabalikan it barangay council ro lugar kon siin sanda nagkriar it gulo agud nga magpanglimpyo hasta sa area it C. Laserna St. para ipakita sa tanan nga ro mga pamatan-on hay may mahimo para sa ikamayad it banwa.
