Ginbuhinan it Hong Kong ro andang COVID hotel quarantine requirements it tatlong adlaw eon lang para sa mga naga-abot maghalin sa ibang nasyon.
Suno kay chief Executive John Lee matapos ro tatlong adlaw nga pagtinir sa designated quarantine hotels, magapaidaeom man ro mga bag-ong abot sa ap-at nga adlaw nga “medical surveillance” sa anda mismong panimaeay ukon maskin siin nga hotel.
Antes kara, ro mga overseas arrivals hay ginaabot it pitong adlaw nga quarantine sa andang mga designated hotels.
Ginklaru man it Hong Kong nga ro “medical surveillance” period hay ginataw-an it kahigayunan ro mga tawo nga magbisita eon sa nagakaeain-eain nga mga lugar nga nagakinahangean it vaccine passes nga igapresenta kapareho eon lang sa mga bars, gyms ag mga amusement centres.
Engkaso man nga ro mga bisita sa Hong Kong hay magnegatibo sa COVID sa sueod it ap-at nga adlaw, sanda hay ginapasugtan eon man nga magsakay sa mga public transport, makatrabaho ag makabisita sa mga shopping centres ukon mga public markets.
Madumduman nga nauna eon nga ginbatikos ro Hong Kong bangud sa hugot nga travel restrictions apisar nga maabu eon sigon nga ekonomiya ro nagbukas ag napahaeuga it andang mga health protocols.
