KALIBO, Aklan—Owa pa it ginpagguwa nga pinal nga sueondanan ro Department of Social Welfare and Development (DSWD) angot sa distribusyon it educational assistance para sa mga pigadong estudyante.
Ginpahayag ni Atty. May Rago Castillo, tagapaghambae it DSWD-6 nga nakataeana pa eamang nga magpueong makaron nga adlaw ro mga regional director kaibahan si Secretary Erwin Tulfo para talakayon ro nagakaigo nga tikang.
Ginpasiguro ni Atty. Castillo nga may pagahimuon nga adjustment para malikawan ro uman nga pagdagsa it mga pumueoyo sa kada venue.
Nag-apela man raya nga indi anay mag-adto sa mga munisipyo bangud owa pa maitugyan kanda ro responsibilidad sa pagpanupod it ayuda.
Ginaplanuhan pa eamang sigon it taeatapan nga makipagbueoligan sa mga LGU ag DILG apang owa pa raya naisapinal.
Target sigon nanda nga mataw-an it prayoridad ro mga pumueoyo nga nagpila ko unang adlaw it releasing apang owa makabaton.
Base sa datus it DSWD-6, naga-abot sa P500 million ro gintaeana nga pondo para sa Western Visayas.
Nasayuran nga naga-abot eon sa P21.3 million ro kabilugan nga naipanupod sa kapin sa 5,260 nga mga benepisyaryo.
Ginakaeakipan raya it 719 halin sa Aklan kung siin ro pondong nai-release hay P2,671,000; Antique nga may 613 ukon katumbas it P2.2 million; Capiz nga may 957 ukon katumbas it P4.7 million; Guimaras nga may 671 ukon P1.7 million; Iloilo nga nakalista 1,713 benepisyaryo ukon katumbas it P7.7 million ag Negros Occidental nga may 587 ukon katumbas it P2.2 million.
Ro distribusyon it educational assistance hay igapatigayun kada adlaw it Sabado nga magabuhay it hasta Setyembre 24.
