KALIBO, Aklan–Pabor si Aklan 1st district board member Nemesio Neron nga maging optional eon lang ro pagsuksok it face mask sa mga outdoor places.
Suno kay Neron, makabig nga welcome development ro nasambit nga tikang sa pagsueong it ekonomiya it nasyon.
Nagapati imaw nga sa rayang pamaagi hay mas maga-umwad ro sektor it turismo bangud mas maabu nga turista ro ma-engganyo nga magbisita sa Pilipinas.
Apang, kinahang-ean sigon nga maging madahan gihapon ro mga pumueoyo eabi eon ro mga may comorbidity para makalikaw sa virus.
Dapat sigon nga ipabilin gihapon ro pagiging vigilante kamana man nga indi maging kampante bangud owa pa natapos ro away kontra COVID-19 pandemic.
Padayun man kara nga gina-engganyo ro publiko nga magpabakuna ag magbaton it booster shot para makaangkon it dugang nga proteksyon kontra sa deadly virus.
