KALIBO, Aklan—Nag-apela ro Aklan Electric Cooperative ukon Akelco sa mga member consumer owners nga magtipid sa paggamit it kuryente kasunod it pagtaas sa sukot it kuryente tuga it nagatinaas nga presyo it coal sa pangkalibutanon nga merkado.
Suno kay Akelco General Manager Atty. Ariel Gepty nga naga abot eon sa 450 dollars per metric tons ro coal base sa actual nga presyo it pag-import it mga power supplier it Akelco.
Naka-apekto pa sigon sa presyuhan kara ro giyera sa tunga it Russia ag Ukraine.
Dapat suno kana nga maging wais sa power consumption samtang owa pa naga-stabilize ro presyo it coal sa world market.
Sambilog suno kana sa mga pwedeng obrahon it publiko para makatipid it kuryente hay ro pagbo-oe sa saksakan it mga appliances kon owa ginagamit ag pirmeng paglimpyo sa mga raya kapareho it aircon, electric fan ag iba pa.
Ginpasiguro man nana nga ginahimo it electric cooperative ro tanan agud nga ma-minimize ro presyo it kuryente.
Sa makaron suno kana hay sambilog ro Akelco sa may manaba nga power rates sa Western Visayas.
