Aminado ro Aklan Environment and Natural Resources Office ukon AKENRO nga may naga-eksister nga ordinansa ro sangguniang panlalawigan it Aklan angot sa sand and gravel quarry operations sa probinsiya.
Suno kay Evy Yap, administrative assistant II it AKENRO nga nakabaehag sa Ordinance No. 06-10 nga kinahangean nga hasta eamang sa 15 cubic meters ro karga it sangka truck nga nagahakot.
Mag-eowas kara, dapat nga may nagakaigo man nga tabon ro andang mga kargang baeas agud nga malikawan ro pag-uyang sa karsada nga delikado sa mga motorista.
Antes sigon nga makaguwa it quarry site hay gina-usisa it andang mga gintaeana nga checker ro karga.
Dugang pa nga umpisa alas-8 it agahon hasta alas-5 eamang it hapon, halin it lunes hasta sabado ginapasugtan nga mag-quarry sa aklan river , apang anuman nga oras hay pwedeng makahakot halin sa stock pile sa quarry site.
Sa pihak kara, ginklaru it AKENRO nga owa sa andang hurisdiskyon ro isyu angot sa gina-alegar nga overloading nga mga truck nga ginaturo nga pagkasamad it karsada.
Madumduman nga nauna eon nga ginareklamo it barangay council, residente ag mga motorista ro pirme ag haeos owa it katapusan nga pag-repair sa provincial road nga sakop it barangay bacan sa banwa it banga nga makabig nga takaw-disgrasya.
