Ginpakigbahin ni Pangueong Ferdinand “Bongbong” Marcos Jr. Ro mga programa it anang administrasyon sa ikamayad nga eawas, trabaho, ag katawhayan para sa mga Pilipino.
Raya hay bilang kaparte sa gihapon it anang unang ika-100 adlaw it anang pagdumaea bilang punong ehekutibo it nasyon.
Ginpahayag it pangueo nga kaparte sa anang mga programang hay ro pagplastar it sangka mapag-on nga pundasyon para sa uman nga pagbangon it nasyon umpisa tag nagpaeanasa ro COVID-19 pandemic.
Kapareho eon lang it presenteng PinasLakas campaign it gobyerno nga nagpadasig pa sigon sa bakunahan it booster shot ag COVID-19 vaccine sa Pilipinas sa pakigbuligan it Department of Health ag Department of the Interior and Local Government.
Sa makaron, kapin sa 73 milyong mga Pilipino eon ro nakabaton it daywang dose it nasambit nga bakuna, samtang 19 million eon man nga mga Pilipino ro nakapaturok eon it andang booster shot, ag kapin sa 81,000 doses eon man it COVID-19 vaccine ro natatao sa mga publiko adlaw-adlaw.
Gintalakay man ni Marcos Jr. ro naging pag-apela it mga healthcare workers angot sa andang special risk allowance.
Kung madumduman ,nagprotesta ro pilang grupo it mga medical workers sa printi it taeatapan it Department of Health (DOH) para uman nga ipaabot sa gobyerno angot sa andang mga benepisyo may kaangtanan sa COVID-19 nga wa sa gihapon nababato hasta sa makaron.
