KALIBO, Aklan—Ginpasaeamatan it lokal nga gobyerno it kalibo ro tanan nga mga nakibuylog sa madinaeag-on nga pagpatigayon it opening salvo it Kalibo Sto. Niño Ati-Atihan Festival 2023 ko Sabado nga adlaw, Oktubre 8.
Suno kay Carla Suñer Doromal, executive assistant 1 to the mayor nga ro nasambit nga event hay humakot it mataas nga numero it mga merrymakers partikular sa festival area.
Pila sa andang ginpasaeamatan hay ro mga nakisadya nga mga grupo ag tribu halin sa nagkaeain-eain nga banwa it Aklan kamana man ro provincial government, stakeholders ag iba pa.
Naging sulit suno kana ro andang preparasyon bangud nga sa pihak it pagdagsa it mga tawo hay kabilugan nga naging malinong ag maayos ro event.
Sangka insidente eamang it kinagamo ro natabu, apang madasig man raya nga natapna it mga otoridad.
Dugang pa ni Doromal nga ro Kalibo Ati-Atihan Festival Board ukon KAFEB ag iba pang volunteers hay nagahandum nga mas pang mapa-improve ro Kalibo Ati-Atihan Festival sa Enero it masunod nga dag-on kun sa siin ginaduso nga mas pang hugtan ro seguridad nga igapatuman.
Sa pihak nga parte, gindugang pa ni Doromal nga naging positibo ro sabat it kaabuan sa ginplastar nga video presentation para sa mga naging accomplishments ni Kalibo Mayor Juris Sucro sa anang unang ika-100 nga adlaw sa pwesto.
Sa pihak nga kueabos sa oras, natigayon nanda nga maipakita ro pagtrabaho it alkalde para maabot ro handum nga bag-ong Kalibo.
