KALIBO, Aklan–Ginpahayag it National Grid Corporation of the Philippines ukon NGCP nga gin-activate nanda ro andang protective equipment ukon protective system matapos nga maka-experiensiya it transient fault.
Raya hay kasunod it natabu nga pagsabog ag pagkaeayo tuga it malfunction sa Central Negros Electric Cooperative ukon Ceneco reclamation area feeder.
Suno kay Reagan Alcantara, Lead Specialist it Public Relations department it NGCP raya ro pinakarason it pagkaduea it supply it kuryente sa pilang parte it Negros Occidental ag bilog nga Isla it Panay bandang alas-12:57 it aga-aga it sabado, oktubre 15.
Tuyo sigon it nasambit nga tikang nga maprotektahan ro andang mga equipment.
Samtang, bandang alas-2:30 it aga-aga hay amat-amat eon nga nagbalik ro power supply matapos nga maayos ro nahalitan nga recloser ag iba pang linya.
Apang nag-trip off ro mga planta rason nga nag-eawig ro naexperiensiyahan nga power interruption.
Ginpahayag dugang nga ro nasambit nga insidente sa BREDCO port area hay nakaapekto man sa transmission grid it Panay.
