KALIBO, Aklan—Ro katarata hay ro paglabo it lens ukon natural nga lente it mata it sangka tawo.
Raya hay makit-an sa likod it iris ag pupil nga parte it atun nga mga mata.
Ro katarata hay ro nagapangunang rason nga nakakaapekto sa panan-awan it milyung-milyon pumueoyo sa bilog nga kalibutan nga masami sa mga naga-edad 40 anyos pataas.
Apang, may mga kahigayunan man nga maskin ro mga bag-ong tawo nga eapsag hay pwedeng makaangkon kara.
Suno kay Dr. Ken Dela Cruz, sangka Opthalmologist nga pila sa mga rason it pag-angkon it katarata hay ro diabetes, family history, pag-angkon it hypertension, radiation nga nagahlin sa silak ag maabu nga iba pa.
Nakakaapekto it mabahoe sa quality of life it sangka tawo ro pag-angkon it katarata.
Raya ro rason it eubusan nga pagkabulag it kaabuan eabi eon it mga senior citizen.
Suno sa pagtuon, haeos tanan nga tawo hay pwedeng maka-eksperyensya kara eabi eon sa paggueang apang may una nga pilang cataract prevention methods nga pwedeng makabulig sa paghinay it development ukon para magnaba ro risk nga makaangkon kara.
Samtang, kung ro katarata hay grabe eon ag eubusan eon nga nakaapekto sa panan-awan it sangka tawo kaeabanan hay gina-rekomenda eon ro cataract surgery para maibalik ro vision.
Raya hay euwas ag epektibo nga operasyon nga masami nga outpatient procedure.
