KALIBO, Aklan—Plantsado eon ro deployment plan it barangay council it Andagao, Kalibo sang dominggo antes ro piyesta minatay.
Suno kay Punong barangay Roselyn Dela Rosa it Andagao, Kalibo nga magabutang sanda it tanod sa crossing it San Lorenzo Drive ag Calachuchi road para magbulig sa mga kapulisan ag iba pang law enforcement agency sa pagbantay ag pagtao it seguridad sa mga pumueoyo nga nagasueod sa sementeryo.
Ginaeauman eon sigon nanda ro pagbuhos it mga tawo sa tanan nga sementeryo ag memorial parks matapos ro daywang dag-on nga restrictions.
Gin-engganyo man kara ro mga pumueoyo nga mag-adto it temprano agud nga malikawan ro pagdueotdutan.
Ginpadumdom man ni Kapitan Dela Rosa ro mga pumueoyo nga likawan ro pagdaea it de botelyang ilimnon, armas ag mataeom nga bagay.
Ro mga gate it sementeryo hay pagabuksan umpisa alas-6:00 it agahon ag magasarado it alas-9:00 it gabi-i halin Oktobre 31 hasta Nobyembre 2 sandig sa ginpagguwa nga Executive Order ni Kalibo mayor Juris Bautista Sucro.
