KALIBO, Aklan–Mabahoe ro maibulig sa pagpaidaeum sa Aklan sa state of calamity matapos ro naexperiensiyahan nga grabeng pagbaha ko miyerkules nga adlaw tuga it bagyong Paeng.
Suno kay Second District Board member Jay Tejada nga sa ginpatigayon nga special session it Sangguniang Panlalawigan, nagkasugot ro mga miyembro, sa pagpanguna ni Vice Governor Reynaldo Quimpo nga mapabakod ro hinyu ni Aklan Governor Jose Enrique Miraflores nga mapaidaeum sa State of Calamity ro bilog nga probinsiya.
Suno kay Tejada nga tuyo kara nga mapasugtan ro gobernador nga magamit ro 30% it Quick Response Fund agud nga masabat ag mabuligan nga makabangon ro mga taga Aklan partikular ro mga eubus nga nadaeasa it bagyo.
Ro nabilin suno kana nga 70% it pondo hay pwedeng itaeana sa rehabilitasyon.
Mag-eowas kara, pwede man nga maka-avail it calamity loan ro mga empleyado.
Sa inisyal report it Provincial Disaster Risk Reduction and Management Office ukon PDRRMO, ap-at ro namatay samtang daywa ro nagapabilin nga missing sa pagbaha.
May pilang lugar pa sa aklan ro owa gihapon it suplay it kuryente.
Base pa sa report, naga abot sa 15 nga mga baeay ro eubusan nga nasamad matapos nga anuron it baha.
Mag-eowas kara, naga abot sa P21,484,203 pesos ro kahalitan sa agrikultura; P62,200,000 pesos man sa imprastraktura samtang masobra sa 16,000 nga pamilya ro apektado nga ginaeakipan it 42,061 nga indibidwal.
Pila sa mga raya hay nagapabilin pa sa andang natungdan nga evacuation center.
Sa pihak nga parte, ginklaru pa ni SP Tejada nga owa it legal question kon magadeklara it kaugalingon nga state of calamity ro sangka banwa.
Apang pwede man nga indi ag gamiton eon lang ro ordinansa it provincial government nga sa una sa state of calamity ro bilog nga probinsiya.
