KALIBO, Aklan—Desidido nga magpasaka it kaso ro sangka ginang matapos imaw nga tuepon it anang kakilaea sa sueod it bueangan ko adlaw it Sabado, Nobyembre 12.
Suno sa biktima ag tagreklamo nga Rebecca Marquez it Purok 1, Brgy. Laguinbanwa East, Numancia nga maayos imaw nga nagpaeapit sa suspek nga si Charlie Costudio alyas Baldo, 32-anyos it Brgy. Bulwang para abertihon parte sa anang sang libo nga utang.
Apang, nagpamalibad sigon ro suspek nga owa raya it ikabayad bangud napiyerdi sa bueang ag insigida imaw nga gintueop.
Masyado sigon nga madasig ro hitabo kung siin nagresulta raya sa anang pag-angkon it gaob sa mata ag gisi sa kilay.
Posible sigon nga mainit ro ueo it suspek matapos nga mapiyerdi sa bueang.
Matapos ro insidente hay nag-uli eon ro ginang ag nagpa-medical.
Eubos sigon nga ginkaakig it anang pamilya ro natabo kana kung siin pursigido sanda nga magpasaka it nagakaigo nga kaso agud mataw-an it leksyon si Baldo.
Nasayuran nga nakataeana nga mag-atubang sa barangay makaron nga adlaw ro magtimbang nga parte.
