Nagpanindugan si Kalibo sangguniang bayan member Ronald Marte nga makabig nga legal ro operasyon it peryahan kon uwa it nakaeakip nga sugae.
Raya hay matapos nga gin-renew it lokal nga gobyerno it Kalibo sa sueod it sang buean ro operasyon it daywang ka peryahan sa banwa.
Raya hay sandig man sa ordinansa it banwa kon siin nakabaehag nga ginapasugtan ro mini-lottery.
Apang, kinahang-ean nga gina-regulate raya bangud nga makabig nga sugae kon may maeagkuan nga taya ag papremyo nga nagakinatabo sa sangka hampang.
Ginpaathag ni Marte nga ro premyo dapat may mga kagamitan ukon stuffed toys bangud nga ro peryahan hay ginakabig nga kalingawan ukon kalibangan it mga indibidwal nga gustong magrelax kaibahan ro andang pamilya.
Madumduman nga ro pag-isyu it operational permit sa daywang ka peryahan hay ginbase sa ordinansa ko 2013 kon siin nakabaehag dikara ro oras it operasyon it peryahan, ro mga indibidwal nga allowed nga magsueod, ro mga amusement rides nga ginatanyag kaparehas it feries wheel ag ro mga hampang nga ginakabig nga mini-lottery kaparehas it color games, bingo games ag iba pang kaparehas nga hampang.
