KALIBO, Aklan–Ginhangkat ni Aklan 1st District Board member Nemesio Neron ro mga natungdan nga ahensya it gobyerno nga tutukan ro operasyon it daywang ka mga peryahan sa banwa it Kalibo.
Gin-insister kara nga dapat maging agresibo ag alerto ro mga otoridad sa pagpabilin it kalinong ag katawhay sa bilog nga komunidad.
Suno kay SP Neron, indi dapat magduha-duha sa pagkondena sa mga iligal nga aktibidad sa baylo hay mas pabaskugon ro ginapatigayun nga monitoring ag pag-usisa sa operasyon.
Indi sigon dapat pagpasugtan ro anuman nga klase it sugae maisot man ukon mabahoe ro eakip nga kantidad.
Nagapati man ro opisyal nga mas maabu ro daea nga disbentaha kaysa sa bentaha it sugae sa mga tawo.
Raya sigon ro masami nga nagiging rason it pag-away it iba.
Ro katuyuan it pagtukod it peryahan hay para makatao it kasadyahan sa mga pumueoyo ag bukon it lugar para maging pasugaean.
