KALIBO, Aklan—Uman nga nagpadumdum ro Office of the Provincial Veterinarian sa publiko nga likawan nga magdaea it mga karne it baboy ukon pork products sa pagbiyahe pasueod sa probinsiya it Aklan.
Raya ro ginpahayag ni Dr. Mabel Señel, provincial veterinarian kasunod it ginakabaeak-an nga pagpasueod it mga baboy ag mga pork products bangud sa mga selebrasyon ag okasyon sa masunod nga mga binuean partikular ro Paskwa ag Ati-Atihan festival.
Tuyo kara nga mapabilin nga hilway ro Aklan sa African Swine Fever ukon ASF nga presenteng nagapanaeasa sa pilang mga banwa sa probinsiya it Iloilo.
Ginpaathag ni Dr. Señel nga ro ASF hay makamaeatay sa oras nga makatapon sa mga alagang baboy.
Sa oras nga makaangkon it kumpirmadong kaso it ASF, igapaidaeum sigon sa culling ro mga alagang baboy nga nakasueod sa 500 meter radius halin sa infected area.
Sa makaron hay region 7 eon lang ro nagapabilin nga ASF free sa bilog nga nasyon.
Ro ASF suno kana hay owa pa it bueong ag bakuna bangud nga tuga raya it virus.
Sa pihak nga parte, indi sigon makatapon ro sakit sa tawo maskin nga makakaon it infected nga baboy.
Sa pihak nga parte, agud nga padayun ro pagiging ASF-Free it probinsya, mas pa nga ginpabaskog ro border control partikular sa mga entry points sa mga lugar it Cabangila, Altavas; Poblacion, Altavas; Lupo, Altavas; Nabas Boundary; Poblacion, Buruanga; Mayapay, Buruanga; Bagumbayan, Buruanga ag Caticlan Jetty Port.
