KALIBO, Aklan–Nag-apela si Kalibo Sangguniang Bayan member Augusto Tolentino sa iba pang miyembro it konseho nga sundon ro nakabaehag sa revised internal rules partikular sa ginpasa nga Resolution 2022-0173.
Suno kay Tolentino nga klaro nga nakabutang sa gin-amyendahan nga resolution nga limitado eamang sa 15 items, tatlong resolution ag tatlong ordinansa ro pwedeng ipasa it mga SB member kada session mag-euwas kung ginsertipikahan nga urgent it alkalde ukon presiding office.
Makabig sigon nga “unfair” ro nagakatabo para sa ibang miyembro nga ginalimitahan.
Gin-insister pa kara nga umpisa ko Oktobre 24, 2022 hay natueopangdan eon kara ro masobra sa ap-at nga resolution ukon ordinansa nga ginapasa it pilang SB member nga ginpasugtan man it in-charge.
Dapat sigon nga mataw-an raya it aksyon sa mas madali nga panyempo agud nga indi eon mauman pa ro anumang pag-eabag.
Sa pihak nga parte, ginkwestiyon man it opisyal ro pagpabaya it pilang empleyado it Sangguniang Bayan matapos nga owa it ginpahaum nga pamahaw para sa mga bisita sa ginpatigayun nga public hearing ko Nobyembre 15.
Makahueoya suno kana ro natabo bangud may pondo man nga nakataeana ro taeatapan sa kada committee hearing ukon public hearing.
Nagaeaum man raya nga indi eon mauman ro natabo ag ayuson nanda ro andang trabaho.
