Nataeopangdan it Office of the Provincial Agriculturist ag maging it mga bumaeakae ro gulpyadang pagtaas ko presyo it mga panakot ag tinuean-on sa Kalibo public market.
Ginpahayag ni Roselyn Relado, project evaluation officer 1 it natungdan nga ahensya nga base sa andang price monitoring, nagahampang sa P280-P300 pesos per kilo it sibuyas nga puti ag puea depende pa sa presyo it mga traders nga nagadeliver sa mga retailers bangud nga bukon it harvest season makaron.
Dugang pa kara ro naga-inabo nga demand bangud sa nagahilapit nga mga okasyon rason nga may pagtaas sa presyo it mga raya.
Samtang, pag-abot mat-a sa bawang, P120/kilo; eoy-a nga nagaabot sa P60-P70/kilo; P300-P400/kilo mat-a sa siling labuyo samtang ro siling haba hay P180-P200/kilo kamana man ro sweet pepper hay kapin sa P320-P350/kilo.
Sa pihak nga parte, nagasunod man ro presyo it mga tinuean-on kaparehas it maragoso nga kapin sa P140-P150/kilo; hamtak nga P120-P140/kilo; native pechay nga haeos P160-P170/kilo; kaeabasa nga 30/kilo; taeong hay nagahampang sa P160-P170/kilo; kamatis nga P60-P80/kilo nakadepende sa kalidad ag labanos nga P85-90/kilo.
Samtang ro mga highland vegetables nga maghalin pa sa Luzon kaparehas it carrots, repolyo ag baguio bean hay nagahampang sa P100-200 pesos ro kada kilo.
Angot kara, panugyan ni Relado nga mas mayad nga magtanom eon lang it mga tinuean-on sa aton nga ugsaran agud nga makatipid sa pang-adlaw adlaw nga kaean-unon.
