KALIBO, Aklan—Todo depensa ro Department of Public Works and Highways ukon DPWH-Aklan sa mga reklamo nga gina-eapog kanda nga nagahimo eamang sanda it aksyon kontra sa mga lubak-lubak nga portion it karsadahon kon may mga motoristang nagakadisgrasya.
Suno kay Engr. Joey Ureta, chief maintenance division head it DPWH-Aklan nga sa kamatuoran antes pa man ro natabu nga pagka-disgrasya it sangka motorista sa parte it Brgy. Dumga, Makato hay sigidas eon ro andang pag-repair ag pag-aspalto sa mga ginareklamong potholes sa national highway nga sakop it eastern ag western side it probinsiya.
Ro mga naexperiensiyahan suno kana nga mabaskog nga bubu it uean kada adlaw ag gabi-i ro nagiging sabeag sa andang operasyon.
Owa sigon it problema sa andang mga materyales ag personnel bangud nga may nagakaigo raya nga pondo.
Ginpamilit pa nana nga owa ginapabay-an it ahensiya ro nasambit nga problema.
Nasayuran nga sa pag-agi it bagyong paeng nga nagtuga it maeapnagon nga pagbaha sa pilang banwa sa Aklan ro naging rason it pagkasamad it mga karsadahon.
