KALIBO, Aklan—Nagpaandam si Land Transportation Office ukon LTO-Aklan head Engr. Marlon Velez sa andang mga kliyente nga indi magpa-budol sa mga fixers.
Raya hay kasunod it pahayag it bag-ong LTO chief Jose Arturo “Jay Art” Tugade nga mas pang pagapabaskugon ro crackdown kontra sa mga fixers ag red tape sa ahensiya.
Suno kay Engr. Velez nga maabu makaron nga mga nagakalhit nga grupo it online fixers.
Kaangot kara, ginlaygayan nana ro mga LTO clients nga diretsong mag-agto sa andang taeatapan imbes sa mga makadueudang social media accounts ag indibidwal para sa andang proteksiyon.
Kaeabanan suno kana sa mga nabiktima it fixers hay ro nagahalin sa mga maeayo nga lugar ag owa naila nga magpaidaeum sa tamang proseso.
Sa makaron hay mas pa nanda nga ginpabaskog ro andang information drive kontra sa mga LTO fixers.
Kamana man ro pag ayos it andang serbisyo agud nga indi mabuhayan ro transaksyon it mga kliyente.
Gin abisuhan man nana ro andang mga kliyente nga antes nga mag agto sa andang opisina hay kompletuhon ag ayuson ro andang mga dokumento para sa mas madasig nga pagproseso.
