KALIBO, Aklan—Kabilugan nga 2,009 nga household ro nag-graduate eon sa Pantawid Pamilyang Pilipino Program ukon 4P’s it Department of Social Welfare and Development ukon DSWD makaron nga 2022 sa probinsiya it Aklan.
Suno kay Beverly Salazar, provincial link it DSWD-Aklan nga nag-exit eon ro nasambit nga mga benepisyaryo sa programa matapos nga owa eon sanda it mga unga nga naga-edad it 0 to 18 years old ag naka abot eon sa level 3 ukon naging maayos eon ro andang pagpangabuhi ukon nakapa-graduate eon it mga unga sa kolehiyo.
Ko nagtaliwan nga adlaw hay dueueungan nga nagpatigayon it graduation ro mga benepisyaryo it 4Ps halin sa 13 nga banwa sa Aklan.
Ginatawag sigon nanda nga “ani” ro graduation, kun sa siin ginaselebrar ro kadaeg-an it mga beneficiaries.
Ginpaidaeum ro nasambit nga mga household sa andang natungdan nga LGUs bilang kaparte it Kilus-Unlad Framework, sangka case management strategy kun sa siin ginabuligan ro kada sambahayan agud nga padayun nga maging maayos ro andang kahimtangan pinaagi sa nagkaeain-eain nga programa ag serbisyo.
Sa pihak nga parte, ginaeauman nga makaron nga buean it Disyembre hay may panibag-ong mga beneficiaries it 4Ps bilang replacement sa mga nagtapos.
Raya hay igabase sa igapaguwa it DWSD nga “listahanan” ukon listahan it mga poorest of the poor sa probinsiya.
Limitado eamang sa pitong dag-on ro pagtinir sa programa agud nga mataw-an man it bulig ro ibang pamilya nga nagakinahangean.
Kapin sa 26,000 nga 4Ps beneficiaries eon lang ro nabilin sa Aklan.
