Plano makaron it barangay council it Tambak, New Washington nga magpabulig sa lokal nga gobyerno angot sa operasyon it Alcedo bar and restaurant kon siin natabo ro rambulan it daywang ka grupo it kaeaeakin-an ko Sabado it gabie.
Suno kay Punong Barangay Lucille Macario, uwa nagasunod sa ordinansa ro establisyimento bangud nga dapat hasta it alas-12:00 it tungang gabie eamang ro operasyon it mga negosyo sa nasambit nga lugar.
Apang ro insidente hay natabo alas-12:41 it aga-aga kon siin klaro nga pag-eabag raya sa gintaeana nga oras nga nakabaehag sa ordinansa.
Madumduman nga nabun-an ro biktima nga si Sherwin Dela Cruz, residente it nasambit nga barangay it ginaturo nga suspek nga si Joseph Masinda, 19-anyos it Brgy. Mabilo, New Washington.
Nagapabilin nga nakaungot sa ueo it biktima ro siyaw nga ginamit it suspek nga gin-inquest eon sa kasong frustrated homicide kaibahan ro daywang iba pa.
Ginpahayag dugang ni kapitan Macario nga makapilang beses eon nga may kinagamo nga natabo sa prente mismo it establisyimento ag ro mga imbolbado hay halin sa sueod it nasambit nga resto bar.
