KALIBO, Aklan—Magapatigayon ro pamunuan it Bureau of Fire protection ukon BFP-Banga it mga inspection ag pagbisita sa mga baealigyaan it paeupok agud nga makasiguro nga owa it maka-eusot nga ginabawae nga firecrackers ag nakasunod sa guidelines ro mga nagabaligya.
Raya hay matapos nga amat-amat eon nga nakapatindog it stalls ro mga negosyante sa gintaeana nga lugar sa crossing Agbanawan-Libas.
Suno kay SFO2 Felinor Soco, acting municipal fire marshall it BFP-Banga nga nagapatigayon man sanda it hugut nga pagpatrolya kontra sa mga nagabaligya it paeupok sa mga bukon it designated area.
Ginpahayag dugang nga padayon man ro andang pagpadumdum angot sa mga ginabawae nga paeupok.
Base sa Republic Act 7183 ukon ro laye nga nagreregulate sa pagbaligya, pag-obra ag pag gamit it mga paeupok, posibleng makulong it 6 hasta sang dag-on, multa it P20,000 hasta P30,000 ag kanselasyon it permit para sa mga nagabaligya kara.
Samtang, obligado suno kana ro mga negosyante nga ro indi maubos it pagbaligya nga paeupok hay dapat nga ibalik eagi sa supplier bangud sa peligro nga hatud kara.
Gin engganyo man nana ro publiko nga likawan lang ro paggamit it paeupok ag maggamit eon lang it torotot ukon iba pang bagay nga makatuga it sangag.
Suno kay SFO2 Soco nga ro andang pag-instrikto hay agud nga magapabilin nga eowas ag malinong ro selebrasyon it paskwa ag bag-ong dag-on sa banwa it Banga ag bilog nga probinsiya it Aklan.
