Binawian it hueam nga kinabuhi sa kasagsagan it selebrasyon it paskwa ro sangka siklista matapos nga ginbuno-patay sa Brgy. Tigayon, Kalibo.
Ginkilaea ni PSMSgt. Velasco Nabor Jr. it Kalibo municipal police station ro biktima nga si Michael Tijano, 25-anyos samtang ro suspek hay nakilaea man nga si Erwin John Eulogio, 18-anyos ag parehong residente it nasambit nga lugar.
Base sa inisyal nga imbestigasyon it pulisya, samtang naga-inuman ro suspek sa andang panimaeay hay gulpi nga sumueod ro biktima kaibahan si Zion Von Aeron Diangson, 18-anyos nga una sa idaeom it impluwensya it aeak.
Bangud sa may dating banggianay ro magtimbang nga parte hay nakaangkon sigon ro mga raya it komprontasyon hasta nga umabot sa punto nga nagbueo it kutsilyo si Eulogio ag ginbuno kay Tijano nga nakaangkon fatal nga lastro sa anang waea nga hawak nga gintunaan it anang hinali nga kamatayon.
Nadaea pa sa ospital si Tijano apang binawian man it hueam nga kinabuhi.
Samtang, gilayon man nga nagsurender si Eulogio ag presente eon nga nakakulong sa Kalibo PNP station para sa nagakaigong disposisyon.
