KALIBO, Aklan—Nagapabilin nga mahaba ro pila it mga tawong gustong makit-an sa ulihing panyempo ro bangkay it namatay nga si dating Pope Benedict XVI.
Suno kay Bombo International Correspondent Girlie Ongoco it Rome, Italy nga sa unang public viewing hay libo-libong mga katoliko ro pumila para makit-an ro haya it dating Santo Papa sa Monastery chapel St. Peters Basilica kon sa siin nakasuksok imaw it puea nga roba nga may gold sa kilid.
Ro kulay puea sigon hay nagasimbolo it pagkasubo.
Umabot sa haeos napueong oras ro unang adlaw it public viewing.
apang, gindugangan sigon raya it daywang oras sa masunod nga adlaw agud nga may kahigayunan ro tanan nga makaabot sa nakahamtangan it bangkay it dating Santo Papa.
Una kara, nagpatigayon anay it pribadong ceremony ro Vatican nga ginpangunahan ni Cardinal Mauro Gambetti ro Archpriest it St. Peter’s antes nga ginbuksan ro public viewing.
Igapatigayon ro eobong ni Pope Benedict bandang alas-4:30 it hapon sa adlaw it Biyernes oras sa Pilipinas.
Pagapangunahan ni Pope Francis ro Requiem Mass sa St. Peter’s Square kon sa siin imaw ro magiging unang Santo Papa nga magapatigayon it funeral service sa anang ginbuslan sa posisyon.
Igaeobong ro dating Santo Papa sa Grottoes sa tunga it Basilica kon sa siin idto nakaeobong si St. John Paul II bago ro anang beatification.
