KALIBO, Aklan—Haum eon ro sangka participating tribe para sa uman nga pagbalik it sadsad contest it Kalibo Sr. Sto. Niño Ati-Atihan Festival 2023 sa Enero 14.
Suno kay Engr. Lucas Francisco, tribe leader it tribung black beauty boys it Barangay Linabuan Norte, Kalibo nga may 85 porsiyento eon sanda nga haum para sa contest, kun sa siin pilang finishing touches eon lang ro ginahimo sa andang mga costumes.
Eauman sigon ro mas makolor ag masadya nga pagpasundayag it mga tribu makaron nga dag-on sa uman nga pagbalik it face to face nga selebrasyon matapos nga mapaiway it haeos daywang dag-on tuga it covid-19 pandemic.
Aminado man ro grupo nga mas naging exciting ro pagpasakop makaron nga dag-on bangud sa gintaeana nga mataas nga cash prize it bag-ong bilog nga Kalibo Ati-Atihan Festival Board ukon KAFEB nga imaw makaron ro nagadumaea sa festival para sa magapanguna sa big tribal category nga kauna-unahan sa kasaysayan.
Nasayuran nga waeo ro magapasakop halin sa banwa it Makato ag Kalibo sa bilog nga adlaw nga Ati-Atihan street dancing contest.
Ro Black Beauty Boys, Maharlika Tribe, Pangawasan Tribe, Pride of Libtong, Tribu Alibangbang, Tribu Linabuanon, Tribu Tiis-Tiis, ag Vikings ro magapa-indis-indis para sa kabilugan nga P1,720,000 pesos nga premyo.
Mag-eowas kara, doble man sigon ro gintau kanda nga subsidiya it lokal nga gobyerno kumpara ko nagtaliwan nga mga dinag-on.
Ro black beauty boys hay gintukod ko 1959 ag haeos 12 beses nga naangkon ro kampeonato.
Makaron nga 2023 nga edisyon it Ati-Atihan Festival hay baeantayan kon uman nanda nga mabawi ro kampeonato sa Vikings it Dumga Makato nga nagdaog ko 2020 Ati-Atihan street dancing contest.
Ro kampeon hay magabaton it tumataginting nga P1 million pesos, kun sa siin ro P350,000 pesos hay naghalin sa LGU-Kalibo pinaagi sa KAFEB ag ro nabilin nga P650,000 pesos hay naghalin kay Kalibo mayor Juris Sucro.
Ro first runner-up hay maga-uli it P300,000 pesos ag ro second runner-up hay magabaton it P170,000.
Ro mga magadaog it special awards para sa best in costume, best in street dancing, best in beat and sounds ag most disciplined hay may nakataeana nga tig-P5,000 pesos nga premyo kada sambilog.
Ro black beauty boys hay may masobra sa 80 nga dancers ag masobra sa 100 nga mga drummers kaibahan ro mga reliever.
